قصة حياتي مع الموت

"قصة حياتي مع الموت"
الجزء الاول:
كاع الناس عارفين بلي ماشي كلشي تيبغي اقرا القصص تاع الرعب والغموض والتفكير في الغيبيات. وكاين ناس لي عزيز عليهم هاد العالم المشوق لي كولو غموض وتشويق ورعب (عالم الجن والشياطين) وتنلقاوهم ديما تيقلبو في المواقع لي لعندها علاقة بالعالم الاخر (الجن والسحر) باش ارضيو فضول التفكير في الامر الغامض. حتا داروها هواية وكبرو الموضوع شوية وقررو ادخلو لهاد العالم واجربوه عن قرب بحال لي درت انا.
كنت دايما تنكول بلي الرعب والبحت في كتب السحر والتعمق في الموضوع هير تسلية او ممكن اكون هير ترفيه لنفس لا اكتر.انا تنكول هاد لكلام لاني دخلت لهاد التجربة بدون قصد والله ما كانت نيتي اوقع هادشي كامل لي كان هدي انهي حياتي. ولي ما تيخاف ومفايتش ليه قرا شي حاجة على الرعب فبلا ما يقرا قصتي.
انا اسمي عبد الرحيم وعندي24 سنة كنت عايش حيات عادية الحمد لله وخا كانت شي مشاكل لاكن ديما متنخليهاش تاثر على النفسية ديالي لان من غير الرعب ديما تنقرا القصص تاع الناس لي عندهم مشاكل اكتر واكبر تنسى ديالي وما تتبقا قيمة لماشاكلي قداماهم .
لمهم قصتي بدات فاش كنت تندير واحد البحت على كائنات الظلام حينت بالصراحة كلشي تيخاف من هاد المخلوقات لي تتعيش في الظلام.وبقيت تنقلب من موقع لموقع ومن صفحة لاخري ما لقيتش شي حاجة لي هدي تقنع الفضول لي كان فيا والو مشيت لشي كتب حتا هوما تنلقا نفس الكلام والقصص وخا كانت احداث واقعية بلسان باحتين وعلماء في هاد العالم وحتا شهاداة اطباء نفسيين لي عاينو حالات ناس دازو من هاد التجارب.
صافي عييت من داكشي وفقتد الامل بلي راه هدي نلقا شي حاجة لي هدي ترضي الفضول ديالي ما علينا قلت ننزل نتسركل شوية ونبدل الجو نشم شوية الهوا برا الدار.كان الليل والضلام في الزناقي بحال الا الضو مقتوع وبقيت تنتخيل صور تاع الجنون وتحضير الشياطين لي كنت تانشوف في الانترنت لي تتخلع الناس بقيت تنتمشى وتفكيري سارح معاهم ما نكولش ما كنتش مخلوع لاكن بحكم انا ديما تنشوف هاد الصور كانت الخلعة ناقصا شوية. سمعت الصوت تاع التلفون تيصوني وانا نجاوب :الوووو????
هو: الوو عبد الرحيم انا هيتم لباس عليك فينك اصحبي من قبيلة وانا تنصوني عليك الفيكس.
انا:لباس الحمد لله انا راه خارج من الدار فينكاين انت دبا.
هيتم:انا قريب من الجردة في تنكلسو ديما لي حدا الروضة المنسية.
انا:حتا انا قريب من تما 5 دقايق ونكن عندك.
لمهم تلاقيت معا هيتم وبقصنا هضرة تتجبد هضرة وحتا هو عزيز عليه بحال هاد المواضيع حينت هو اصلا صحافي وتيركز على هاد المواضع لي ثتير الجدل بين الناس وكلت هدي هي الفرصة . وعاودت ليه كلشي بالتفصيل الممل.وطلبت منو اعاوني و اشوف ليا شي قصة تكون مرعبة من الدوق تاعو لاكن تكون واقعية وحقيقية. قالي صافي انا هدي نشوف ليك شي وحدة تكون من النوع لي تيعجبك...

قالي صافي انا هدي نشوف ليك شي وحدة تكون من النوع لي تيعجبك.
وهنا وصلات واحد الوقت في الليل تفارقنا ورجعت انا لدار وقريت واحد القصة تاعت السحر الاسود لي ما حركات فيا والو كان هادشي ولا عندي عادي.
النهار التاني تاصل بيا هيتم وقالي انا راه لقيت ليك واحد القصة وهي حقيقية ومن نوع خاص ما شي فيديو ولى قصة مكتوبة بحال لي فايت تتقرا هدا واحد الولد تنعرفو وتيكولو بلي وقعات ليه شي حاجة غريبة هاد الايام ما بقاش تيخرج ولة هير ساد غليه في بيتو وحتا واحد ما تيشوفو اش بان ليك نمشيو عندو.
انا وافقت بلا ما نتردد ودرنا الميعاد والوقت فاش هدي نتلقاو ونمشيو نشفوه.